Tag Archives: Астана

Елордадағы жерүсті өткеліндегі лифт 14 жылдан бері жұмыс істемейді

Әмина Козбакова
KAZGUU Newsroom

Бараев көшесіндегі жерүстік өткелі. Фото: Әмина Қозбақова

Елорданың Байқоңыр ауданындағы А. Бараев және Ж. Тәшенов көшелерінің қиылысында орналасқан жерүсті өткеліндегі лифт 14 жылдан бері жабық тұр. Аудан тұрғындары жолдан өткен кезде қиындықтар туындайтынын айтып, әкімдікке наразылық білдіріп жүргеніне де біраз болыпты. Ал қала әкімдігі лифтінің істемеуін “жобадағы кемшіліктерге” сілтеп, сараптамадан өтпегенін айтады. Ол өткел орнатылғаннан бері іске қосылмағанын айтады. Жергілікті билік құрылысқа кім жауапты болғанын және оған қанша қаражат кеткенін айтпай отыр.

Өткелге жақын Бараев көшесінің бойында орналасқан көпқабатты үйдің тұрғыны, жалғызбасты ана Эльвира Ибрагимова бұл жерден күніне бірнеше рет өтетінін айтады.

“Үйде төрт балам бар… Соның екеуін күнде таңертең мектебіне апарып, өзім алып қайтам. Ал кенже қызым әлі кішкентай. Оны үйден алып шықсам амалсыздан коляскамды көтеріп осы өткелден өтемін. Үш кішкентай баламен баспалдақтан өту қиын”, – дейді ана.

Ал тағы бір тұрғын Фарида Көпбосынова өткелдің орнына жаяу жүргіншілер жолын орналастыру қажет екенін жеткізді.

“Мен осы жақын маңда тұрамын. Жолдан өту үшін бұл өткелден басқа амал жоқ бізге. Ең жақын жер Бараев аялдамасының арғы жағында. Күнде баспалдаққа мініп жүруге жас емеспіз ғой. Лифттің барынан жоғы артық. Оның ашық тұрғанын бір рет те көрмеппін”, – дейді ол.

Бұл өткел осы аумақ тұрғындарының жолдан өтетін қауіпсіз әрі ең қысқа жалғыз жолы. А.Бараев және Ж.Тәшенов көшелері қиылысына ең жақын орналасқан жаяу жүргіншілер жолы 800 метр қашықтықта орналасқан.

Жерүсті өткелі салынғалы бері лифт ешқашан іске қосылмаған. Фото: Әмина Қозбақова

Астана қаласының Көлік және жол-көлік инфрақұрылымын дамыту басқармасының (ары қарай – Басқарма) хабарламасына сүйенсек, Бараев пен Ташенов көшелерінің қиылысында орналасқан өткел 2008-2009 жылдар аралығында жүргізілген көлік айырымының жөндеу жұмыстары аясында салынған. Алайда, өткел құрылысына 14 жыл өтсе де, ондағы лифт әлі іске қосылмаған.

Басқарма өкілі редакцияға берген ресми жауабында “Лифт шахталары құрылыс-монтаждау жұмыстары аяқталмағандықтан жабылды, атап айтқанда лифтілерді орнату жүргізілмеді” деп түсіндіреді. Ал сол кезде оны орнату жұмыстарына қанша қаражат жоспарланғанын және қызмет қай мердігер компаниясынаа ұсынылғаны жайлы сұраққа басқарма жауап бермеді.

Өткелдің қазіргі жағдайы оның қараусыз қалғанын. білдіреді. Фото: Әмина Қозбақова

Басқарма басшысының орынбасары О. Шабданов  “өткел құрылысының ұзақтығына байланысты бюджеттік соманы көрсету мүмкін емес” дейді.

“Қазіргі уақытта бұл мәселе қаралуда және жақын арада жоғарыда аталған жаяу жүргіншілер өткелінде лифтілерді орнату және іске қосу жұмыстарын жүргізу жоспарлануда”, – деп түсіндіреді басқарма өкілі.

Шабданов Newsroom тілшісіне лифт құрылыс аяқтаудың нақты мерзімі мен оған бюджеттен бөлінетін қаражатты айтудан жалтарды.

Елордалық оқушылар автобусты суық аялдамада күтуге мәжбүр

Ақбаян Арапшаева
KAZGUU Newsroom

Тонған оқушылар аялдама артындағы дүкенге жылынуға кіріп барады. Фото: Ақбаян Арапшаева

Астанадағы мектептердің үштен екісінің жанында жылы аялдама жоқ. Жергілікті билік тапсырыс бергенін айтады. Бірақ мердігер компания міндетін толық атқармаған. Инвесторларға да коммерциялық аялдама орнату тиімсіз болғаны белгілі болып отыр.

Астана қаласы тұрғыны, қоғам белсендісі Салтанат Әшірбай осыдан үш ай бұрын Facebook желісінде №65 және №67 гимназия оқушылары аязды күнде автобус күтіп тұруға мәжбүр екенін жазған болатын. Содан кейін жергілікті билік байланысқа шығып, мектеп жанынан жылы аялдама қондыратынын мәлімдеген.

“Аялдамаларын қоямыз дегенше балаларымыз мектеп бітіретін шығар. Әлеуметтік серіктестік деген ұғым болады. Мысалы, құрылыс компаниялар салған үйлерінің жанынан міндетті түрде мектеп және балабақша салуға тиіс. Әкімдік оны тексеруі керек. Оны қарап жатқан ешкім жоқ. Оның кесірін қарапайым халық, біздің балалар көреді”, — деді ол.

Newsroom тілшісі жағдайдың мән-жайын білу үшін гимназияға барды. Расында мектеп оқушыларының далада тоңып, автобус күткенін, кейде жылыну үшін жақын жердегі дүкенді паналайтынын көрді. Ал кешкі уақытта автобусқа сыймай қалған балалар кейінгісін тағы күтуге мәжбүр болыпты.

Аталған гимназиялар жанында бұрын жылы аялдама болған екен. Оны жергілікті билік өкілі растады. Осы аялдама арқылы қатынайтын Апбас Дана есімді қала тұрғыны аялдаманың орнынан алынып тасталғаны “ыңғайсыздық тудырғанын” айтады.

Сарыарқа ауданы әкімдігі мәліметінше, билік пен жекеменшік компаниялар арасында қала бойынша коммерциялық аялдамалар орнатуға келіссөздер болған. Бірақ жоба шығыны ақталмағандықтан, кәсіпкерлер аялдаманы өзге жерге көшіріп алып кеткен екен.

№67 гимназия жанындағы аялдамада кешкі уақытта автобусты күткен адамдар саны көбейеді. Фото: Мадина Ахметова

«Ол аялдама көп шығын әкелді. Себебі апта сайын ішінде бір затты сындырып кетеді, ластап кетеді. Оны тазалайтын, жөндейтін адамға әр шыққан сайын 15-20 мың теңгеден төлеп отырдық”, — деді коммерциялық аялдамалармен айналысатын Санат есімді кәсіпкер.

Санат өзінің тегін әрі компаниясының атын зерттеу мақаламызға жазуды құптамады. Ол басқа аудандарда аялдамалары барын және оларды алып тастау жоспарда жоғын жеткізді.

Сарыарқа ауданы әкімдігі №65, 67 гимназиялар жанына жылы аялдама қою 2022 жылы жоспарда болғанын мәлімдеді. Бірақ тапсырыс алған мердігер компания өз міндетін орындамаған.

“Жоспарға сәйкес олар (мердігер компания – ред.) 2022 жылы 10 аялдама қою керек еді. Соның қатарына біз жаңағы гимназия (жанындағы) локацияны да берген болатынбыз. Алайда олар тек 9 (аялдама) орнатты. Қазір жол көлік департаменті мен оның мердігерлері арасында жұмысты дұрыс орындамады деген айыппен сот ісі жүріп жатыр”, — деді жергілікті билік өкілі.

Осыған дейін жылы аялдамаларды орнату мәселесімен Астана қаласы Көлік және жол көлік инфрақұрылым дамыту басқармасы айналысып келген. Билік өкілі қазір бұл міндеттемені аудан әкімдіктері құзырына беру ойластырылып жатқанын мәлімдеді.

Аудан әкімдігі дерегіне сенсек, Сарыарқа ауданы аумағындағы 55 жылы аялдаманың 12-сі мектеп маңайында орналасқан.

Бұл тек Сарыарқа ауданына қатысты мәселе емес. Астана қаласындағы аудан әкімдіктерінің дерегіне сенсек, қаладағы 96 мектептің 37-сінің жанында ғана жылы аялдамалар бар.